余彭年 投資之道

有「中國第一慈善家」之譽的香港富商余彭年，年前決定將全副身家捐作慈善用途。

1973年股災，余彭年曾說「虧損了相等於目前幾個億的資金」。對於股票投資之道，是一年最多買一兩次，每次專吼大跌時出擊。買了之後，擱在一邊，不理升還是跌，待升了三成就不貪心，沽出獲利，不再後悔。買股一年一兩次 升兩三成就走。

跟很多老一輩的香港投資者一樣，余彭年在1973年的股災近乎傾家蕩產，把手上物業押給銀行炒股。「股市由1700多點，一直跌至300多點才沽出，在香港的房地產差不多輸清光。我得到的經驗就是以後不貪心，一年只買一次、兩次股票，買了之後就去旅行，升了兩三成就走，跟去澳門賭錢一樣，贏錢就走。」

余彭年近輸身家時已50歲，要到台灣東山再起談何容易。「那時真的很辛苦很辛苦。」所以現在他對股票很有戒心。但在2009年3月，當匯控（0005）跌至33元時，他吼準時機買入賺了一筆。「我到58元便賣了出去，後來升至80多元，已不關我事，要賣到最高價是沒可能的，很危險。」

股票屬遊戲 高低均假象

 

月初，他眼見匯控跌至60元左右，令他也「心郁郁」。訪問當天匯控已回升至每股68元，他就打消了念頭。「股票只是遊戲，一高一低，都是假的，平買我就不擔心，反正賺多了，就多做些好事（指捐錢），賺少了，就少做些好事。」

老雀 嫩雀

黃台之瓜 唔摘就笨

 

壹傳媒(282)老闆肥佬黎親自宣佈出讓台灣業務交易告吹，並聲言不會再出賣台灣報刊生意。肥佬黎講嘢信住佢兩成先，但呢次交易唔成，壹傳媒肯定受重創，肥佬黎真正係賠了夫人又折兵，散戶都應該喺呢單交易學到啲嘢，就係股價升唔沽就笨。

　　壹傳媒呢個46億交易不完成，訂金要退回，無訂金可殺。仲有仲有，壹傳媒本來在去年10月作價3億港元賣走台灣壹電視業務畀年代電視董事長練台生，後來殺出新買家要電視、報紙一起買，才終止與練台生的交易。壹電視年蝕10億港元，如今無端端揸多半年，等如蝕多5億(仲要短期賣得到)，真是偷雞不成蝕把米。

　　壹傳媒硬啃勁蝕

　　呢一役肥佬黎固然損兵折將，但不少壹傳媒股東無沽貨亦大歎走寶，呢個憧憬破滅的個案，都可以做一單教材。壹傳媒去年9月股價浮沉在0.7元左右，公佈台灣賣盤交易後，股價在去年10月18日大升至1.76元，然後反覆回，停牌前收市價1.17元，估計復牌後要大插。

　　我識得兩個朋友都有揸壹傳媒，一個好叻分段走清，我叫佢「老雀」；一個一股都無賣到，我叫佢「嫩雀」。「老雀」在1.7元、1.5元、1.4元三個位沽貨，平均沽貨價1.53元，如今睇佢好醒。我問「老雀」點解咁叻走清，佢答我「唔貪」，反正買回來炒，好多人計來計去計壹傳媒賣走台灣業務後值幾多錢，佢唔計，復牌日見試盤價1.7元，未開市已落定盤在1.7元、1.8元、1.9元分三批沽貨，佢話若然咁樣分批沽清平均沽貨價1.8元，佢會賺1.3倍，仲想點？結果上唔到1.8元，只沽了三分一。隻股回落，但到12月中佢見隻股炒高到1.7元又行人止步，一浪低於一浪，就搵位走埋佢。老雀話1.5元時沽可能錯過交易成功升上2元的機會，但交易不成1元都守唔住，佢就唔博啦。

　　至於「嫩雀」就好慘，一股都無沽過，原來佢揸咗呢隻股好耐，當年有100萬股，高峰期股價5元，佢揸的股價值過500萬(隻股曾經5合1，等如現價25元！)合併後佢得番20萬股，股價又大跌。我問佢做乜今次升到1.7元唔沽？佢話見過500萬之後，家1.7元都只係34萬，黃台之瓜，何堪再摘？而且佢亦睇好賣台灣業務後股價會高好多。我就話黃台之瓜，唔摘就笨！唔能夠話見過500萬，就唔執10、20萬，13年前美好的科網股高潮日子不去不返，做人都係現實啲好。散戶有時係咁，輸到無眼睇，但唔睇仲輸得多。同時太懷念過去的股價，唔肯接近隻股「永遠不能回到過去價位」的事實。

28032013 睦羽仁 頭條日報

國際投行「空襲」有迹可尋

 

國際投行唱好或唱淡A股或港股的目的都為銀。2012年9月，摩根大通、瑞銀、花旗等國際投行頗「一致地」唱淡民行，不單該股股價受壓，連整體銀行股也受壓，但民行大股東史玉桂與民生都謂銀行基本面OK，史玉桂更不斷增持民行，結果股價一直升上逾12元高位。史玉桂更在帳面賺了幾十億元，成為去年人所共知的股市大贏家。

史玉桂於去年國際投行唱淡兼沽空民生銀行時就指出，這些國際投行的「空襲」路綫圖：

1‧先找要攻擊的對象；

2‧大量借入有關股票；

3‧先沽出部分借入的股票，造成股跌現象；

4‧再發表唱淡報告；

5‧然後找可供造淡的藉口，例如業績公布不好，即死；業績公布符預期，即是增長不夠多，要死；業績公布超預期，即是已透支未來，遲早死……總之使市場達到個恐慌，該股會死，故要Sell；

6‧一旦投資者有懷疑，便將借入之股份大手、大成交量地沽出。普通看圖的分析者和投資者就會判斷：價跌，成交增；跌勢未完，應沽貨，從而導致滾雪球效應，圖使股價雪崩式下瀉，散戶便出貨；

7‧暴跌時及之後，沽空的投行「靜雞雞」在低位買回股票；

8‧歸還股票，掠水走人，留下有關的股票管理層和不知情的低位出貨散戶在舐傷口。

史玉桂所言的造空掠水圖譜是不斷上演的，十多二十年前，香港也有件「偷雞唔到蝕隻牛」的事件。股票名不記得，是隻五、六、七、八綫股，有人借貨沽空，但被「被沽空者」用銀彈接去所有沽出之貨，使到股票歸邊，沽空者未能在合約到期時夠貨歸還，結果是要在市場買回，「被沽空者」亦加入搶貨行列，結果股價由0.6元（還是6元？記不得了）升上逾16元。結果是沽空者與「被沽空者」場外講數，沽空者要「蝕隻牛」走人。


攻防戰綫將蔓延

要使無端沽空者受教訓，重點是用銀彈，你沽我買，由於無端沽空者是用借來的貨，亦只有借來的時間，這兩個是死穴。只要無端沽空者沽極股價跌不下，時間（借貨時限）會自然逼死無端沽空者。但如果沒有個銀主狠下決心，與無端沽空者作一死戰，無端沽空者通常偷不到雞都執到隻鴨，不會蝕隻牛。

港股歷史，無端沽空者蝕到「嘔泡」一役是1998年，港府打大鱷一役，當年逾270隻對沖大鱷在港衝擊港股匯，港府用1,200億買股，兼抽緊銀根，對沖大鱷沽股，價不下，兼加上借貸成本升，只好投降。當年不少市場論者都謂干預不該，筆者謂這是保家趕賊，自衞之舉。筆者更援引瑞典之前保其匯的例子，要將利息抽上500厘始可平亂，結果當年港息一度升上300厘，借錢、借貨的對沖大鱷在借貸資金成本大升時，只有「走頭」一路。

 

25032013 石鏡泉 Skypost

如何獲利

賣出點

一個複雜的問題，將之分開「投資的我」和「投機的我」來處理。若是「投資的我」買股，買入相對大隻的股份，目標是較長的年期，若是進入位較低，如今有20%以上的利潤，承受下跌的能力較好，本來也不一定要出出入入。不過，如股市的波動加大，即使是「投資的我」，建議是趁高位減持三分一至三分二，沽多少隨風險喜好而異，通常是年初沽，年中買(5月打後)，有20%以上利潤可沽，等跌番10%以上買番(以大股計)。
 

沽貨的風險是遇上升過不停的大牛市。即使係大牛市，因為無沽清，仲有三分一貨在手，都可以享受到，而你沽到一股不留，就要忍受沽完再升之痛。你會分到有些股份係大股，升極有個譜，沽得急無壞，有股份係中型股，如果買得平，有翻倍的可能，唔一定要咁快沽，即係可以坐，記住投資可以長。
 

投機的我唔同，流轉要快，有糊要食。投機唔可以俾自己輸，唔好捱價，更需要食糊。所以有20%利潤，老大沽一半，其餘一半以買入價止蝕，咁就一定唔輸，若以買入價高10%止賺，夾埋一定有賺。記住炒作之關鍵係令自己年年有正回報，唔好一舖輸清。
 

我有個朋友係炒匯高手，佢話俾我聽佢後生時一個經驗，佢以100萬開倉(5%按金，即係炒緊2000萬)，有一排炒得好順，100萬好快幾個月變200萬，心雄，倉位愈開愈大，以為自己係炒神，唔設止蝕止賺，一個浪打過來，幾日間，200萬輸到變10幾萬，個倉著哂紅燈要追按金，佢捱到個市反彈打哂靶，只有20萬，佢話若設止賺，個倉剩150萬時可以走哂，起碼到本金位100萬都應該走，佢無走，就變到得「幾條毛」。
 

呢個朋友就由20萬炒番起，用兩年時間炒番上100萬，叫做翻本，玩3年要重頭來過，不過學到一樣，佢以後落盤已定好全部止蝕及部份止賺位(通常先食一半)，咁就輸極有個譜，兼且一開始諗好退場部署，順勢可以賭耐，逆勢即刻閃，佢之後就不斷保持炒匯有正回報。
 

『買股容易沽股難』
 

要正確沽貨止賺一定唔係容易事。例如炒匯高手，佢100萬炒到上200萬，心雄唔在講，升到高位一定有好多利好消息跟尾，一定好多所謂專家見好唱好，要走起個party大家玩到好high時，有得玩有得食又有靚女滿場走時，要你抽身沽貨離場你話幾難？不過佢之後兩三年可以20萬炒返上100萬，即賺左5倍，萬中無一，現實係輸埋個20萬居多，特別係炒匯，用5蚊本去100蚊貨，只要睇錯跌5%就可以輸到渣都冇，你想等佢升返？Sorry！你已經破左產，即使你睇中升返都唔關你事。

 

 

唔識止賺止損輸到入肉，但「反敗為勝」那部份就係異數。

 

 

止賺之難，係大部份人無發達夢就唔去炒作，有發達夢想佢到時到候走真係好難，所以最好係定好方法才入場。有好多反對止賺的說法，例如「止蝕唔止賺」，「讓利潤奔跑」等等，因為買入好股，升少少就食糊，以後有大茶飯都食唔到，例如200美元買蘋果，200幾就走，唔知佢最後可以升到705美元。又例如幾年前30、40元買騰訊(700)，升到50、60元好高興就沽，無諗過佢可以升到280元。呢都係過早止賺走哂雞的古仔。

 

 

問題係股王百中無一，雞股十之七八，當中有騙人股，有生意失敗股，有市場逆轉股，有生意唔錯但市場唔炒照跌之股，理性的方式是研究個股的情況，判斷佢屬於乜類別，估計佢生意的前景，然後才決定是否止蝕唔止賺，當中有好複雜的技巧，講就容易，做好難做到。若一旦判斷錯誤，買著雞股唔係好股，結果都可以好災難性。

 

 

股價好難估，即使內幕人也如此，騰訊主席馬化騰在2009年3月和投資銀行簽訂期權合約，收取期權金，向對手出售一個允許對方在兩年後以每股67.8元向他買入200萬股騰訊股份的權利，當時騰訊股價為55元港元。到兩年後要履行合約按價沽貨時，騰訊是192元! 你話買平幾多?馬化騰共做了4份共800萬股期權售股合約，以每股賣平100元咁去計，馬化騰唔見8億!

 

 

但唔好以為馬化騰係傻仔，佢呢個古仔除了告訴大家唔好信內幕消息之外，還展示第一個策略，分段減持，若你手上有好多貨，見價升何妨分段減持，即使賣平，你還有大量賺錢貨，若然睇股價真係跌，起碼套了部份現。所以我話散戶買股睇中大賺，第一個方法是部份減持，留部份再睇，若然你比較保守，買的又是大股，可以唔清倉，最多沽三分之二，已足夠食股市一年的升跌浪。

 

 

第二個方法是第一個的變奏，最買中一些暴升股，例如騰訊這一種以倍升的股份，是沽部份貨足夠收回本金，其餘部份全部是賺番來的，你若覺得公司有長遠發展前景，放埋一邊唔理佢，笑傲江湖，已保本不會輸入肉。例如你33元買騰訊，升到100元，沽三分一收回成本，其餘的就可長。這一個浪升一倍的股份都唔少，例如你在低位1.1元買保利協鑫(3800)，見佢升到2.2元，怕大市回頭佢跟住回，何不先沽一半，其餘一半長?

 

 

第三個方法是定位止賺，例如高位回10%或15%就沽貨，這個策略比較適合一些升勢較穩定的大股，例如騰訊在09年3月低位40多元起步，一直升到2010年1月，基本上係完美上升，一直升到176元，當中好少有大回吐，若定15%止蝕，可以睇到176元，然後在回吐15%至150元出貨，當然不能食盡佢整個升幅，但食到一年的完升浪。也可以將分段減持和定位止賺結合，第一注先在急升時食，往後的定位止賺。

 

 

我比較贊成做事唔好去盡，唔好信哂各種分析，買可以買錯，沽可以沽錯，沽錯是沽得過急，沽平，但唔沽打回原型，都有遺憾。股和樓不同，樓好多時只得一間，只能做一個或沽的決定，股可以拆散來做，有好多空間，唔信哂某一種分析，咪拆三分一或一半去做囉。調過頭來，一個升市升完就回吐，你一股都無沽過，又好似白走一場。

 

 

陸羽仁 18022013